|
دينا ريان
خدي إللي بيحبك.. اسمع كلام أمك وما تسمعش كلام أبوك.. وخد إللي من دمك وما تخدش إللي همها مالك.. وخدي إللي بيريدك لحسنك وأخلاقك ما تخديش إللي عاوزك لحسبك ومالك ولمركز أبوك أو لمركز وحسب مامي بتاعتك.
وأضرب الودع وأقرأ الفنجان, هذا كلام الست إللي بتفتح الودع في فيلم فريد الأطرش وشادية وهند رستم بقدر ما تذكرته مع بعض التحوير والتدوير ما يضرش!
كتبته بعد ما رأيت بعيني ماحدش قالي واحد عريس من الشباب الواعد يبحث عن واحد عروس صالون, وقد حدد لها شروطا مهمة جدا أن يكون وسطها43 سم وثلاثة أربع وطولها167 سم ونص ومحيط الصدر مش عارفة كام ومقاس القدم37 طبعا ناهيك عن اللون والشعر.. وإلخ فهذه أمور مفروغ منها ولم أصدق ما رأيته حتي أكدته لي واحدة من زميلاتي الأعزاء جدا..
وعاتبتني علي ما كتبته في الأسابيع الماضية من أن الحب من طرف واحد في الإسلام مرفوض وأن البنات دلوقتي لابد وأن تنتهز الفرصة, فالعرسان الجاهزون المحترمون طلباتهم فوق العادة قد وصل الأمر بهم في زواج الصالونات أنهم يسألون عن مقاس وسط العروسة, ومحيط الصدر وطول الذراعين وعرض الكتفين, وأن والدة العروس ما بتصدق ييجي الراجل ابن الحلال إللي عاوز بنتها من غير مازورة آقوم آجي أنا مثل الخازوووق وأقول لهم الحب من طرف واحد ولا من طرفين وإرضاء لصديقتي أم البنات أقول لها إنني أقول لابني وأصحابه وكل عرسان اليومين دول, أو ما تبقي منهم بدون أن يذهبوا مع سراب اليمين أو اليسار أو أكل الماكدونالدز أو دمار التعليم الواطي والعالي والعام والخاص أو مع جنون الأمريكان في الكلية أو تشبهه بهم في جامعات ميمي وفيفي ونونو بك, يا شباب اظفروا بذات الدين فعن أبي هريرة رضي الله عنه عن النبي( ص) قال: تنكح المرأة لأربع لمالها وحسبها وجمالها ولدينها فاظفر بذات الدين تربت يداك صدق رسول الله( ص) فالمسلم إنسان من البشر يعجبه المال والجمال والحسب ولا مانع من كل ذلك لكن الصفة الأساسية كما تقول أستاذتنا سوسن أيوب في كتابها واستوصوا بالنساء خيرا هي الأساس الذي لو غاب الخير كله لأنه الباقي والذي يعوض أي نقص هو صفة الدين, وهكذا يصحح رسولنا الكريم الأولويات.
والكلام ليكي أيضا يا فتاة.. وربنا هو الهادي يا شباب اظفروا في حياتكم بشريكات وشركاء حياة عندهم دين وملة ويخافون ربنا يمكن المستقبل يتغير في أحفاد الأولاد وأنا عندي أمل.. تقولوا إيه غتاتة..
|
